Como se constrúe unha ilusión? Que ocorre cando a sorpresa se converte nunha linguaxe universal?
A maxia non só entretén: conecta, emociona e esperta a marabilla. Para pechar a Xornada de Emprendemento e Innovación Social da Maker Faire Galicia, o 14 de xuño na Área Central (Santiago de Compostela), Joshua Kenneth invítanos a mergullarnos nun espectáculo participativo que combina o ilusionismo moderno, o humor e unha gran dose de imaxinación.
Cunha carreira internacional que inclúe escenarios como o Magic Castle de Hollywood e o programa Penn & Teller: Fool Us en Las Vegas, Kenneth representa unha nova xeración de ilusionistas que entenden a maxia como unha ferramenta para compartir, crear e sorprender. A súa actuación será un momento para celebrar a creatividade na súa forma máis pura, cunha proposta pensada para todos os públicos.
Joshua Kenneth – Ilusionista
Graduado da primeira promoción da Universidade de Ilusionismo de San Lorenzo del Escorial, foi finalista de Spain’s Got Talent e recibiu múltiples premios en convencións de maxia nacionais e internacionais. Combina os seus espectáculos coa formación e o deseño de experiencias máxicas para eventos culturais e educativos.