Charlas

Gonzalo Blázquez Gil traballa en estratexia e produto no ITG Centro Tecnolóxico, onde impulsa a transferencia de tecnoloxías avanzadas á industria.

Especialista en intelixencia artificial, participa en proxectos de I+D+i nacionais e europeos. Ademais, xestiona o equipo de Tecnoloxías Cuánticas, con especial atención á criptografía cuántica e poscuántica aplicada a infraestruturas críticas como portos, redes enerxéticas e defensa.

Tamén é docente e director de traballos de fin de grao na Universidade Europea de Madrid.

Canto falta para a cuántica? O que xa funciona e o que está por chegar

Ordenadores cuánticos, comunicacións imposibles de espiar, criptografía capaz de resistir ordenadores que aínda non existen… Canto hai de realidade e canto de promesa?

Revisaremos en que punto se atopan realmente as tecnoloxías cuánticas: que se utiliza xa hoxe, que chegará nos próximos anos e que segue sendo obxecto de investigación.

Ademais, contarei que estamos a facer no ITG Centro Tecnolóxico e, en especial, no proxecto ARQADE: «Alianza de centros tecnolóxicos para a computación cuántica accesible e dual en defensa e sectores estratéxicos».

Veremos por que a chegada do ordenador cuántico obriga a protexer desde xa infraestruturas críticas como os portos ou as redes enerxéticas, e como se combinan a distribución cuántica de chaves e a criptografía poscuántica para conseguilo.