Charlas

María de la Fuente é doutora en Tecnoloxía Farmacéutica, investigadora sénior do SERGAS e cofundadora, directora executiva e directora científica de DIVERSA Technologies.

Leva máis de vinte anos traballando en nanomedicina para desenvolver novas formas de tratar as enfermidades e trasladar os avances científicos aos pacientes. En 2022 cofundou DIVERSA, unha empresa biotecnolóxica galega nacida da investigación sanitaria pública que desenvolve nanotecnoloxías para transportar moléculas terapéuticas e crear novos medicamentos, con especial atención ás terapias baseadas no ARN.

A súa traxectoria conecta investigación, transferencia e emprendemento cun obxectivo: converter o coñecemento científico en solucións que xeren un impacto real na saúde e na sociedade.

«DIVERSA: Nanomedicina para chegar ao paciente»

Que fai falta para que unha idea nacida nun laboratorio hospitalario acabe converténdose nun medicamento? María de la Fuente leva máis dunha década intentando responder a esa pregunta, primeiro como investigadora en nanomedicina e despois como fundadora de DIVERSA Technologies, unha empresa biotecnolóxica xurdida da investigación sanitaria pública galega.

Nesta charla contará ese percorrido, desde o momento en que publicar deixa de ser suficiente e a motivación xorde do obxectivo de chegar aos pacientes, ata o que implica montar unha empresa tendo formación científica e construír un equipo desde cero en Santiago.

Explicará tamén en que traballan hoxe, con nanopartículas capaces de transportar moléculas terapéuticas ao interior das células, incluídas terapias baseadas no ARN, e cun modelo que combina desenvolvementos propios con proxectos xunto con hospitais, universidades e empresas.

Unha historia de ciencia, colaboración e emprendemento, cunha convicción de fondo: medrar e innovar só ten sentido se xera un impacto real.