Proxectos

Orixe Salgada transforma as algas de arribazón que se acumulan nas costas galegas en extractos funcionais mediante un proceso físico, natural e sen residuos.

O proxecto está desenvolvido por un equipo multidisciplinar liderado por Elena Fontán, doutoranda no Campus do Mar da Universidade de Santiago de Compostela, e combina coñecemento dos ecosistemas mariños, biotecnoloxía e desenvolvemento industrial.

A iniciativa nace para dar unha nova saída a unha biomasa local que, tras ser retirada das praias e dos bancos marisqueiros, adoita ter poucas vías de aproveitamento. Orixe Salgada converte este recurso infrautilizado nunha materia prima con potencial para aplicacións en sectores como a agricultura, a alimentación, a nutracéutica e a cosmética. Actualmente, os seus extractos están especialmente orientados ao desenvolvemento de bioestimulantes agrícolas.

O proceso baséase en tratamentos físicos e en medio acuoso. A biomasa sométese a diferentes etapas de redución de tamaño, micronización e homoxeneización que permiten liberar os compostos naturais presentes nas algas. Non se empregan disolventes nin tratamentos químicos, tampouco altas temperaturas, e as diferentes fraccións obtidas poden manterse dentro do propio ciclo de valorización.

Deste xeito, Orixe Salgada propón un modelo de economía circular e de residuo cero vinculado ao territorio. Ademais de reducir o impacto ambiental e económico asociado á acumulación das algas, o proxecto busca xerar novas oportunidades para os entornos costeiros e rurais a través da bioeconomía e da economía azul.

Na xornada, o público poderá coñecer de preto como unha materia prima que normalmente se considera un residuo pode transformarse nun recurso de valor.

O proxecto mostra o percorrido completo, desde a recollida das algas ata a obtención de extractos funcionais, e achega á Comunidade Maker un exemplo real de como a ciencia, a tecnoloxía e a experimentación poden dar resposta a problemas do territorio.